Dimane?! È ‘na speranza ‘e chi è guaglione, e nu guaglione è amante ‘e l’ Illusione ch’ ‘e ‘na fata vestuta d’aria e cielo

comm’ a nu suonno trasparente ... 'e velo.
(G.C. 1982)

‘O ‘MBRIACO

Passa ‘a nu munno a’ ‘n ato
e resta vivo.

Stà ‘nmiez’a ttanta gente
ma stà sulo.

Se ‘ncontra cu ‘e lampiune
e se l’abbraccia.

Chiagne p’ ‘a malasciorte
eppure ride.

Sape ca ‘o munno è tristo
e nun ce crede.

Penza ch’ ‘a gente è onesta
e nun è overo.

Pe’ ‘n’ora, na jurnata
o nu mumento

chi se ‘mbriaca penza
‘e cagnà vita,

‘e se scurdà amarezze
e tradimente

cu ll’uocchie stralunate
‘e rimbambito.

Perciò svacanta spisso
‘o fiasco ‘e vino

che l’annebbia ‘o cerviello
e ‘o fa’ campà

senza capi’ ca ‘o munno
è fatto ‘e spine

addò migliare ‘e gente
ogne matina

- senza manco assaggià
nu surzo ‘e vino –

sta già ‘mbriaca primma
‘e se sceta’.

Giuseppe Cangiano
da
‘Nun me tuccate Napule’
1982

blog in sospeso

‘O rumanzo d’ ‘a gente
-Giuseppe Cangiano-

Appena aràpe ll'uocchie

e vide 'a luce

chella luce 'ndurata che sta 'ncielo

• - ca po' te 'mpare ca se chiamma Sole-
  

c' 'o penziero, cu ll'anema e cu 'o core,

senza nu poco e carta e senza inchiostro,

tu scrive 'a primma pagina 'e nu libro,

e chillu libro ca se chiamma 'VITA'.

E te 'ncammine…

Primma zuppechianno, po' cchiù sicuro;

chiano o currenno passe p' 'a trafila

'e stesse cose ch'hann0 fatto ll'ate

primma ca tu nascisse.

Tutto chello che faie

rimmane scritto

comme fosse ìnchiuvato 'int' 'o penziero,

comme avisse stampato nu rumanzo:

• 'e pazzielle,
  

  'e cumpagnielle 'e scola,
  

  ll'amice,
  

  'a piccerella,
  

  'a gelusia,
  

  nu pentimento dopp' 'a scappatella,
  

  'na gioia scuntata cu 'na malatia,
  

  nu vaso che 'na sera t'he arrubbato,
  

  'na prumessa can un he mantenuta,
  

  'na speranza ca po' se sfrantummata… -
  

  
  

Tutto rimmane scritto 'int' 'openziero!

Da uno a ciento

Vierne e Primmavere

s'arravogliano comm' 'a 'na matassa…

'E ppaggine d' 'o libro a una a una

s'ammontonano mentre 'o tiempo passa…

Pe' 'n'ora 'e bene e tante d'amarezza

scancellate cu 'o ddoce 'e 'na carezza

'a matassa se fa sempe cchiù grossa

fino a quanno nu filo nun se spezza.

[...]

Questo blog resterà in sospeso per un po'... come questa poesia che tornerò a concludere -spero- il più tardi possibile.

Statemi bene

‘O VESUVIO

Overamente è ‘nu malato ‘e core
e ‘o miedeco ll’ha ditto ‘e nun fuma’
pecché, si fuma, certamente more
e manco ‘o Pateterno ‘o po’ salvà.

Pirciò se sta quieto, zitto e muto
se cura cu fermezza e vuluntà:
‘o ssape ca si sgarra s’è futtuto
e ‘o berzagliero nun ‘o po’ cchiù ffa’.

Mo dorme...e sonna ‘o diavolo cu ‘e scelle
ca, ‘e notte, ‘o jeva sempe a sfruculia’
cellechianno ‘e penne d”o cappiello
ca ‘o facevano’nzisto: ‘nu gagà.

Pe’ chistu fatto, ‘e vvote, smaniava
peggio ‘e ‘nu toro ch’ha da torea’:
sputava fuoco, cennere e scuppiava
vuttanno prete e llava ‘a ccà a llà.

...E mo nun fuma cchiù! Ma ‘o figlio ‘e ‘ndrocchia
‘o ffa pecché se vo’ fa perduna’
‘e guaie ch’ha fatto e doppo, senza macchia,
quanno se sceta turnarrà a fuma’.

Giuseppe Cangiano

Da “Nun me tuccate Napule”
-1982 -